近來真係好耐都無寫blog, 今日偶爾回來看一下自己的blog, 才發覺自己寫的blog都不是太差, 但當然, 跟其他精緻漂亮的blog比就真的不能相提並論....不過都巳經比下有餘了....

因近來都真的很忙, 寫blog的興趣也愈來愈淡, 有時間都用來研究股票或參加其他課外活動, 所以今次都係返黎自己個blog留個言, 可能係不久既將來我又會寫返都唔定架~

老老實實, 如果唔係有兩張這套片的免費電影coupon, 我係絶對唔會買飛睇英皇d電影. 諗住有coupon, 媽咪又話想我陪佢睇戲, 於是昨晚就同左我媽咪睇.

之前睇過此片的trailer, 覺得應該都唔係咁差, 點知入到場, 真係覺得幾垃圾, 劇情可謂一塌胡塗, 唐三藏取西經的故事可以變成外星人重返地球, 仲要大戰樹妖! 你地可以話佢講創意, 但我就覺得九唔搭八. 此片好頭都有一些適量的笑話, 但就愈講愈唔識笑.

亞Sa的可怕造型又確實係係恐怖, 但當佢變返靚後你就會覺得同變靚前係無咩大分別 . 專登做到唐三藏(謝霆鋒)係一個情聖, 就真係有d牽強.

總括而言, 此片於垃圾片評分上屬4星(5星為滿分), 好彩有那有點兒睇頭的電腦特技拉返高個分數.

其實英皇係咁再”dum”錢落埋呢d垃圾片度, 真係唔知對我地觀眾是福還是禍呢?

真係餓戲餓左好耐, 所以當我知道<KING KONG>上畫我就差不多第一時間去睇. 需然要成$60一張飛, 但片長3小時, 睇後都覺得物有所值.

雖然套戲係翻拍1933年的同名電影, 但兩者的特技真係相差十萬九千里. 故事主線其實同舊作分別不大, 都係係荒島上遇到金剛, 而隻野獸就鐘意左個女主角, 跟住班人就捉左隻金剛返去大城市諗住可以賺大錢, 最後金剛係帝國大廈上大戰戰鬥機, 繼而俾亂彈射死. 雖然橋段大致一樣, 但拍攝手法卻完全不同. 尤其發覺在拍攝他們到了神秘島後見到的骷髏頭的鏡頭, 亞Peter Jackson竟然拍到好似港產片既feel, 攪到我R哂頭, 唔通係美港拍攝手法合璧?

此片於頭段的一小時都比較沉悶, 只係交代男女主角們和整隊team點樣為影片拍攝而尋找神秘島的經過. 但到了電影中段, 戲玉終於出現了 – 金剛大戰3隻食肉恐龍!!! 本人覺得絕對係全片最緊張最刺激的一幕, 揉合逼真的電腦特技效果, 真係睇到我心中不斷喝采, 比尾段金剛爬上帝國大廈更震撼! 另外還有片中眾人跌落山谷底後遇到的各類恐怖逼真的巨型生物, 如巨型飛蟲、起巨型恐怖蜈蚣、巨型大蜘蛛等等, 真係睇到我地全院觀眾哇哇聲!

總括而言, 有愛情, 有刺激, 有特技, 而且此片頗拍得到金剛對女主角感情那份的執著, 那份痛愛. 看後都幾使人傷感.

今日係泰國散打自由行的最後一天, 其實都無咩特別好寫. 都係執拾細軟後乘車到機場坐飛機返香港.

當天我都係訓到10點才起床, 而我女友就晨早走左去游水, 因佢好enjoy呢間酒店的resort feel, 所以佢就爭取最後的時間去享受呢度既陽光與泳池, 我都雖然都好享受呢種度假心情, 就游水就唔係好o岩我喇, 所以我後來都係係陽台上哂一哂陽光就算.

之後約11:30am就係酒店門口等"的士"(以前一晚巳經搵租車公司book定, 由芭堤雅去曼谷機場包車盛惠$800銖, 價錢都算合理)去機場, 然後搭4:00pm機回香港. 返到香港都成下午7點機, 回到家巳經9點多.

泰國自由之行就此完結, 旅程尚算好玩, 但始終都覺得去泰國玩參加旅行團會抵玩過自由行, 因為機票及食宿等都會平好多, 而且又有導遊帶你週圍玩, 好過自己去”力”住本旅遊書週圍搵; 但相反來說自由行卻可慢慢"hea", 唔洗好似旅行團趕鴨仔咁趕, 所以各有各好, 下次再去玩時要再細心度度先.

~The End~

今日一早起身落酒店coffee shop食早餐, 食完早餐後就開始今日的行程. 因為昨晚漏夜巳plan好今日行程做d乜, 所以突然覺得d時間好似好好用 . 我地先在酒店哂哂太陽, 游游午泳(其實係得我女友游, 因我唔係好識游泳, 我只是攤在太陽椅上哂哂太陽, 看看書本罷了). 跟住出返去Royal Garden Plaza商場那邊吃午餐, 食到2點幾就到我既至愛 – 打保齡. 係香港既時候就成日打, 不過宜家就少左, 但係泰國打保齡就真係未試過, 因此拿拿聲食飽飽就開波.

呢到打保齡球絕對平過香港, 只需約HK$14一局, 鞋租則約HK$6一對, 真係抵打! 而且球場裝橫亦不錯, 至於球道既condition就一般, 打完後感覺係成條lane都係油, 好重油, 更加無尾段(那天我地只是下午2-3點光顧條球道就巳經咁樣, 咁即係話有可能條球道尾段洗得唔乾淨!), 不過話哂呢個場館係用黎舉辦國際保齡球賽事的, 可能真係到正式大型比賽時就”一切會變得很美”掛  .

打完保齡後行左陣間, 跟住我地就去買飛睇”人妖show”, 這個節目係我強烈要求既, 黎到泰國點可以唔睇一睇咁出名既人妖表演架! 但因我女友以前睇過同埋睇到麻木哂既關係, 佢就唔會陪我睇, 佢就走去做spa(大約要3個小時, 成HK$500幾蚊港紙架!), 咁我就唯有一個人睇啦!(其實仲好, 耳根落得清靜 )

芭堤雅共有兩間人妖劇院, 一間叫"Tiffany", 另一間應該是新建的, 叫咩名就唔係好記得, 只記得係"E"字頭; 聽地頭蟲阿Tim講: "E"就舞台新裝修, 但人妖就無咁靚; "Tiffany"舞台就比較舊, 但人妖質素就較好. 我最後都選了"Tiffany"(老字號麻), 但一條"冷"盲摸摸咁入去買飛, 當然係要俾正價, 前半排近舞台就$800銖一張飛, 後排就$700銖一張, 我就買了後排的飛, 跟住行左陣間Big C(即係好似我地香港百佳超級市場), 之後就返酒店等夠鐘睇show喇.

到夠鐘入場睇既時候就唔係咁多人, 可能跟我係買最後亦都係最夜的一場有關(9:30pm場), 但短短個多小時的表演卻使我目不暇給. 人妖show主要以不同地方的民族舞或當地的歌曲表演為主, 連早前香港大hit既<大長今>場景都有用上, 算係幾跟得住潮流. 表演中主要演員全要約有9-10個, 大部份人妖都真係幾靚女, 身材又fit, 真係唔講得笑 . 她們內裏有個幾似阿嬌架, 有個則似後生版鮑起靜, 有個就似無線胡定欣, 總之睇得我心花怒放, 快樂的時光係過得特別快既, 眨眼間就差不多10點半完場, 跟住就獨自返酒店喇.

To be continue...

昨晚我們巳執拾好細軟, 今天都訓到10點幾才起床. 之離開酒店求其搵間餐廳醫飽個肚就返去check-out(因呢兩晚酒店係朋友送給我們的Free Coupon, 只包房租, 不包早餐  ). 跟住我地就搭BTS去National Stadium站轉乘巴士去芭堤雅喇~~~

一去到巴士站, 連邊條巴士線都仲未睇楚就巳經俾個泰仔捉左上車 啊~~~原來佢正是那條往芭堤雅巴士的跑腿! 所以就咁上左車, 盛惠每位$100銖(約$20港紙)….另外附送多小小好像給人賣豬仔的感覺 . 經過差不多3個多小時的車程, 我們終於抵達芭堤雅境內, 而架巴士就係一個不知名的地方丟低我們同另一些外國遊客, 這時就有架<喪條>埋來兜生意(即係香港既"的士", 係曼谷的士就叫<篤篤>, 係芭堤雅就叫<喪條>, 而<喪條>只係方便我自己記住既中文音譯, 正確讀法係應該發音要歪少少之餘仲要加少少泰國口音 ). 最後搭左架<喪條>去到我地另一間好有resort feel的酒店.

跟住就出去沿住海邊一路行一路逛路邊的攤檔, 一路行去芭堤雅近市中心區要成大半個鐘! 真係腳仔都軟哂. 之後見有比較大型少少的商場就行入去逛, 而其間亦都聯絡左當地生活既一個泰國華僑朋友亞Tim(我地係網上泰國遊的newsgroup認識佢架, 其實佢都係香港人, 只係娶左個泰國老婆而係泰國定居罷了!), 要靠佢幫我們, 晚上的節目才有著落呢!

到了約定的時間跟亞Tim會合, 我地就向目的地進發, 其實actually個目的地係邊我都唔係好, 只係知道係一間叫<模特兒秀夜總會>(好似係…唔係好記得), 咁節目就當然睇模特兒show啦~~入到去人頭湧湧, 但全部都係黃皮膚的遊客, 細問下完來這裏只招呼中國, 韓國, 日本同香港遊客, 鬼佬及本地人一律免問. 表演台上表演的全都是裸體的model, 那表演甚麼? 當然是跳舞啦!...只是用另一種形式來跳罷了. 睇到個零鐘就離開, 跟住食埋晚飯就返酒店.

To be continue…

自由行的好處就係想訓到幾時起床都得, 第二朝我地就訓到成10點幾才起床. 然後就開始我們第二天的泰國之旅.

今天的行程主要以參觀佛寺及觀光為主. 全程大部份時間以乘搭BTS (即係架空纜車)為主, 貪佢便宜又方便, 想係曼谷自遊行真係要學識搭佢 一大早就行勻大皇宮, 萬佛寺(要收每位港幣$250啊!)同Wat Arun寺(唔記得左中文係咩名), 淨係行哂佢地都要左我地成大半晝! 跟住之後就打的去逛逛<唐人街>, 初時以為個度好多中國人啦~~~點知見到既泰國人仲多, 所以係咁意兜左個圈就走.

到下午5, 6點就轉戰去行商場, 主要係Chit Lom行WorldTrade等的大型商場, 目的就係要幫我地香港既親朋戚友買手信-----其實我就未有買咩, 我女友就係Boots度掃左成3, 4袋, 真係誇張! (佢話因為Boots的產品係泰國平香港成倍有多, 好多friend都托佢幫佢地入貨)

係商場食埋晚餐都成10點幾, 跟住就返酒店執拾細軟準備明天乘車到我地的下一個目標 – 芭提雅.

To be continue…

話哂咁大個仔都係第一次到泰國玩, 咁值得記念既事件, 緊係要寫係Blog度記低佢啦!

當日(26/11/05)我同女友乘搭泰航, 因為自由行麻, 當然唔洗好似旅行團趕搭晨早機咁辛苦, 所以就專登揀左10:45am機, 不過唔知係咪真係太自由行的關係, 我同女友雖然一早巳到機場食早餐, 但係機場入境大堂逛下逛下竟然爭d誤時, 要d機場人員到處搵我地, 原來架飛機淨係等我地起飛咋.

機程約為3個多小時, 訓又訓唔著, 唯有睇下書啦. 終於係當地時間約2點多鐘抵達曼谷(泰國時差慢過香港一小時), 然後打的去酒店check-in, 之後泰國之旅就正式開始.

但其實係Day 1都無咩特別, 始終曼谷並唔係話好多野玩, 咁第一天都係以逛下商場, 食下小食為主. 咁個邊d既大型商場既規模都幾拍得住如香港的Sogo同UNY架(價錢都係), 唯一係食野會比香港略平, 都有幾多唔同地方的食物可選, 有日本菜, 意大利菜, 美國菜等, 算係幾多選擇. 另外, 個日女友(以前做個導遊架!)介紹去左個叫JJ Market的市集逛逛, 係一個好大好大的市集, 類似香港的跳蚤市場, 但規模卻大很多. 售賣各種不同種類的貨物, 小至耳環手飾, 大至睡床傢具都一應俱全! 淨係逛這個市場都用左我地2個多小時, 但只係粗略地行左三份之二, 真係行到腳仔都軟. 另外係夜晚仲去左個叫State Tower既地方, 佢係市中心一座非常高的建築物, 頂層係一個露天pub, 大半個曼谷夜景一覽無違, 真係靚絕!

跟住都係到處行行逛逛, 飲飲食食, 最後成11點幾才返酒店. 寫住咁多, 下次繼續.

 To be continue…

今次我肯跟她一起去其實最主要的原因係我咁大個仔都未去過泰國, 咁繞我女友想話去泰國旅行, 咁我咪順理成章跟她一齊起law~~~期待有一個好玩的旅程啦~~到時希望再同大家分享旅行的趣事 .

全拜BT所賜, 家陣要睇一套電視劇, 再唔需要每星期"伏"定係個電視機睇, 有好多電視劇巳經一早係網上有得download. 好似呢套Lost, 家陣明珠台才播到接近尾聲, 而我就早幾日前剛剛睇哂全套劇集(第一季), 宜家追緊第二季.

講返套電視劇, 故事講述一次空難, 有一批人(約50人)意外後卻仍能生還, 但就被逼滯留於荒島上等待救援. 套劇就係講大家點樣係島上爭扎求存, 跟住大家慢慢發現島上原來有不可告人的秘密......但秘密係咩呢?我都唔知, 因為套劇係第一季全25集中都未有透露, 所以就係咁埋藏了拍第二季的伏線. 因為係美國呢到劇收視爆燈, 拍續集係意料之外, 不過就估唔到會將結果埋落第二季到, 我諗第二季又係收視爆棚的話, 睇怕有排拍(唔通要拍到好似ER咁9個Season咁鬼長命?!) 第二季的內容係講述原來的主角們係島上搵到第二批生還者, 聽落都幾剌激喎, 不過咁就真係有排拍有排玩law~~~

初初睇第一季時頭段做得幾懸疑, 幾緊湊, 真係睇到落尾都仲未知道內裏既迷底(到宜家都真仲係唔知), 不過中途就有D悶, 因為開始叙述各男女角式們的往事, 讓觀眾知道他們撘上這班機是總有原因的.

無可否認外國電視劇集係劇本、佈景、導演、演員、甚至配音等等都比我們香港的電視劇優勝及認真很多, 跟我們香港柴娃娃的電視劇比較, 真係大學生同小學生之比. 外國電視劇劇種新鮮, 題材新穎, 而且角式大都"樣"眼非常, 看得我們目不暇目給, 怎能不追著看呢? 但又不是話香港的電視劇沒有可取之處, 只是每套劇集無需為了遷就星期一至五而把集數免強湊成20集、30集, 那結果便會發現劇集裏有很多無關痛癢的劇情會無啦啦出現, 又或奇怪於某一劇情情節剛開始就突然快跳到情節的結局.

不過在香港這個甚麼都講求快捷效率的社會裏, 要電視劇跳出這個框框, 我想都並不是件容易的事, 而我亦不想在此深究下去. 不過好彩電視台都知道這個幣端, 因此為觀眾提供另一個選擇. 在此不得不讚讚明珠台近來多套超正的電視劇, 如鬼線人、OC、靚太唔易做等等, 而我亦正在追緊鬼線人. 發覺原來每個星期"伏"係電視機追電視劇集都係一種樂趣黎架!

                                               Lost (Season 1)

以下為一些教改寫CSS的Sina Blog, 大家有興趣既都可以去參觀參觀架~~

手作日誌 (藍藍好有心機, 教哂大家點樣改你地個Blog架!)  

零碎角落 (版面很cool的一個網誌)

moliuOLOGY (好多人到訪的一個Blog!) 

CX's Playground (都大家點寫blog)

我都估唔到我係一個月之內會去兩次海洋公園夜場玩. 事緣我女友早排係HA(醫管局)抽中左去海洋公園的門票, 只需以極低價每張飛$60便可購買, 所以就係咁繼上次海洋公園10月中"全城哈咾喂"之後, 我又再次踏入海洋公園了!

昨天我地係4時正就可以正式入場, 但最意想不到的係係金鐘撘巴士到海洋公園個陣時條巴士龍打哂蛇餅, 長到要圍住力寶中心成個圈! 真係誇張. 但當入到去公園後既情況同我上次去的時候就真係有天堂與地獄之別, 哈咾喂之夜個晚成個公園都係人, 講鬼屋, 淨係d機動遊戲都平均每個排成30-40分鐘! 所以個晚只係玩得個2-3個機動遊戲, 真係等到火都離埋; 但昨晚就唔同, 聽講話全場只係得個5000人, 所以真係好free, 全場所有機動遊戲全開. 瘋狂過山車、海盜船、越礦飛車、太空摩天輪、滑浪飛船、動感影院等等等等, 全部可以一玩再玩, 每個遊戲所排的人龍真係短之又短. 反而排得最耐既係摩天輪, 排左起碼20分鐘, 可能特別多家庭陪小朋友一齊玩吧, 其他的遊戲平均都只需5-10分鐘, 有d遊戲直情無人排隊, 要倒轉來等人齊才開動! 另外海洋館同鯊魚館等亦延長開放時間, 大家都可以一家人盡情慢慢參觀. 我地玩到10點半到就巳玩哂全公園的機動遊戲, 跟住係另一邊大樹灣出口離開, 然後撘車再到旺角食埋消夜至各自返歸.

後來聽我女友講原來此活動HA均每年舉辦一次, 活動名稱為"天倫之夜", 而且每次反應均異常踴躍, 所以好似話都會keep進落去攪. 咁我都當然讚成啦! 我真係好耐未試過可以咁樣全程玩盡海洋公園喇, 個一刻既感覺就好似海洋公園係屬於我既, 我可以盡情去玩, 去癲, o黎Ocean Park!

最後大廈都總算解封左, 其實最好就封埋明天, 咁我就擺正牌唔洗返工麻

今晚大家要留意下新聞報導喇!

 今次記述既其實都唔算係趣事, 反而係一件幾震撼既大事. 話說係剛剛3點多鐘, 收到公司司機通知, 話公司大廈全座俾警察封鎖, 唔俾佢進入大廈喎! 咁我地就八掛下D咩事咁巴閉? 係窗口望落大廈門口, 有消房車係度, 初時以為係大廈火警, 但卻無消房警鐘鳴響! 點知睇睇下仲有幾架警車黎埋, 仲要加埋一架好鬼奇怪又未見過既警車, 好辛苦至睇到車身英文寫住"Bomb Disposal", 咁咪即係"拆彈車"?! 咁即刻上網摷新聞睇, 先知原來明報收到恐嚇炸彈郵包!!! 詳情如下: 

跟住仲有最新消息: 

【 16:37 】 明報收到恐嚇信全文 (明報 - 港聞)

柴灣明報大廈明報編輯部，發生郵包爆炸，一名女職員輕傷。明報編緝部就事件發表聲明，強烈譴責此次暴力行為，並重申捍衛新聞自由是新聞工作者的天職，絕不會因恐嚇而退縮。聲明指，編緝部的秘書在拆開一份送給總編輯的禮品時，禮品盒突然爆炸，冒出一陣濃煙，並傳出一陣焦味，女秘書的下巴輕微受傷送院。爆炸的禮品盒是與一朿鮮花，在下午兩時許送明報編緝部。爆炸發生後檯面佈有灰塵，警方接報到場調查。明報編緝部就事件發表聲明，強烈譴責此次暴力行為，並重申捍衛新聞自由是新聞工作者的天職，絕不會因恐嚇而退縮。明報已知會各部門加強警覺，遇有可疑郵件或禮品，切勿隨便拆啟。 

真係咁大個仔都未預過D咁激既事呀~~~希望快D搵到個兇手啦~~香港係一個新聞言論自由既地方黎架麻, 唔可以俾佢發生D咁既事既