昨日上午係屋企打機, 打到3點幾好鬼死肚餓, 所以不情不願咁落街食野, 食飽後見4點零鐘, 見仲有時間, 不如到久未幫襯過既圖書館一敞. 咁去到行左幾圈, 搵極都搵唔到"陶傑"既散文集或著作, 又用過電腦查詢, 點知搜尋結果出現d唔係我原本想搵個個"陶傑"
，加上又差唔多夠鐘close, 咁就唯有求其係架上借本教英文的"美妙英語小故事", 點知返到屋企一睇本書個作者, 竟然係我搵左好耐既"陶傑"!!! 所以話呢, 世事真係好奇妙, 有d野當你係身邊不斷咁搵, 不斷咁搜尋都找不到時, 但冥冥中上天好似自有安排一樣, 會製造緣份, 讓佢係你身邊突然出現! 現實中常常都會有咁既事發生, 真係不由你不信...
再說一次我愛你 - 又係劉德華做主角
昨晚放工後同女友食飯, 之後睇戲. 其實唔係幾想睇, 因近排無咩大片上畫, 大製作如
我本身對<再>呢類型既電影無咩興趣, 當我睇完成套片之後, 結果答案都係一樣. 先撇開眾演員的演技, 編劇其實頗不濟, 劇情給我的感覺是有點老套同牽強. 紫晴(亞Sa飾)既老公高醫生(劉德華飾)跟謝婉深(楊采妮飾)的老公Derek(劉德華分飾)竟然差不多一模一樣, 連聲線都是同一個tone, 世界上都真係幾難搵到. 此位使我投入感大減, 我自己都幾難搵到另一個女人會錯認我係佢老公, 仲要陪我玩咁耐!(但如果你地竟然真係有咁既奇遇, 唔該第一時間通知我, thanks!)
劉德華配Twins既Sa, 雖然有新鮮感, 但同時亦覺得係亞爸同亞女的感覺(極其量都係亞哥同亞妹!). 我並不是一個電影製作者, 亦不是一個專業影評人, 只是以一個觀眾的角度來看. 睇得出導演在拍攝上很花心思, 用了很多拍攝技巧, 用了不少慢鏡製造震憾的效果. 全片悶場雖然不多, 但對我來說巳經非常足夠, 不能再多的了! 我女友則一路睇一路反駁:『係醫院唔會就咁推條屍出黎, 係一定會俾親人看死者最後的一面架; 病人連喉嚨都插埋氧氣喉, 唔好話講說話, 連聲都開唔到啦! 插哂喉仲點會留係CCU(心臟深切治療部)呀?晨早推左入ICU啦(深切治療部)!』雖則佢不停咁駁嘴, 但佢最尾都係眼濕濕離場, 而且不只佢, 我發覺好多同場女仔散場時都"Fat Fat"聲, 可想而知呢套戲確係打動左D女fans的心坎中......(但並不包括我)
劉德華情深款款的樣子, 見慣見熟, 話哂都係影帝麻, 但表現較<童夢奇緣>略為遜色; 亞Sa做返佢自己細佬女的角式, 頗稱職(咁即係無乜演技); 楊采妮則屬一般, 無驚無喜, 做返自己. 老實說句, 主角如果唔係劉德華、亞Sa同楊采妮, 換著其他次一兩級數的演員來演, 真的, 我女友都唔洗迫我陪佢睇呢套戲......
PS 劉華係戲入面所玩的魔術都真係幾入門級, 其中玩啤牌的魔術連我都識玩, 跟馮德倫玩的魔術級數仲爭好遠, 唔該劉生如果真係有興趣玩魔術就真係俾D心機學, 唔好樣樣都學得個半桶水就算, 拜托哂!
阿旺新傳再創三色台神話?
初聽<阿旺新傳>這套劇名的時候, 令我聯想起金庸筆下的名著 - 古有<雪山飛狐>配<飛狐外傳>;今有<戇夫成龍>配<阿旺新傳>, 都幾攪笑. 但<雪>及<飛>的內容是有關連的, 但現今<戇>劇及<阿>劇除了主角及一些配角跟之前同名字外, 其他劇情及角色都是全新制作的. 咁當然, 郭晉安所扮演的丁常旺乃此劇賣點, 而且無線仲落埋order要佢繼續扮弱智, 用返之前<戇>劇的口音同低B動作.
主線劇情都係講阿旺同阿鳳的感情由姐弟情轉到無哂感情, 再由無感情發展到最後終成眷熟. 郭晉安扮演阿旺的弱智青年仍然手到拿來, 看來扮弱智真係佢既強項, 而且今次係時裝劇的關係, 佢扮演既阿旺比<戇>劇時更放、更盡、更惹笑. 宣萱仍然做返佢之前既阿鳳, 與<戇>劇時的比較不見得有進步, 始終覺得佢做戲時只係識得鄒哂眉, 得個幾個眼神同表情, 巳經睇到奄悶; 相反D綠葉就非常搶戲 - 盧菀茵的慳家慈母, 郭鋒"拿拿地"的做型, 湯盈盈的潮爆醜女look, 還有不得不讚就係許紹雄的攪笑角色, 明顯他的戲份巳較<戇>劇時為多, 他一出場就永無悶場, 真係俾佢笑到我全家轆哂落地(其實仲有D角色未出場, 可能佢地仲更加搶戲).
其實最初對此劇並沒有太大興趣, 只因此劇太過著重用"丁常旺"來宣傳, 俾我太重<戇>劇的影子. 過往無線如果特別為了一個受歡迎的角式而去編做劇集, 倒頭來結果大都強差人意. 但當我看多此劇幾集後, 由最初討厭郭晉安的低B冬菇頭造型, 到現在巳經接受(起碼不再討厭). 最緊要係我巳經用另一種心態去看此劇 - 當此劇是一套全新獨立的劇集, 不再與<戇>劇掛勾 - 咁你就會睇得好開心, 而且會發覺呢套其實係一套極度時裝爆笑喜劇添! 
呢幾日好”炆憎”, 因為俾部E680i激親. 點激法? 事緣因E680i好似成部PDA電話咁, 好鬼多function玩, 上網可以搵到好多有趣野玩: 如換theme, 單撈java games, 轉wallpaper, 又可播mp3, 亦可係電腦上轉換video放在手機上播, 總之好鬼多野玩, 更可裝loader玩GBA的遊戲, 終極更能用telent的方法去修改部電話setting添(E680i係用Linux做OS), 真係未出發, 先興奮
但係經過我多方面對部電話作出不斷的嘗試, 安裝, 反安裝同install埋D不知名software之後, E680i巳變得極不穩定, 最近仲hang埋機, 當開啟某些軟件時會顯示不能開啟的訊息, 而且變更鈴聲及轉換wallpaper等的setting都唔俾我做!!! 真係激死, 攪左幾日, reset過部機又唔得, 睇黎最終要返去Motorola原廠俾佢地維修至得...
所以藉此奉勸各位, 如果想買E680i手機, 一定要買行貨, 否則好似我咁樣玩部機法, 就算先達聖手都未必攪得掂, 行貨維修時就算整唔返都可以有權嘈到佢拆天, 就算唔換到部新既機都可以屈佢地其他野麻, right?
但總括來說E680i係一部唔錯既pda手機, 二千零蚊有咁既野玩, 仲想點呀!?
今日終於係公司可以抽到時間靜靜地坐下來寫blog, 忙左成大半個月, 終於可以休息一下, 忙裏偷閒做我的私人事~~
話說上個星期六約左成班同事(一行9人)一齊去參加海洋公園的"全成哈咾喂", 當晚真係人頭湧湧, 與白天的擠湧情況不遑多讓. 全園共有5個鬼屋, 我地都玩唔哂, 只玩得其中4個, 因為每個鬼屋的輪候時間最快既都要大半小時!!! 其中輪候個叫”妖怪陣地”的鬼屋, 等就等了差不多一個小時, 但入去就玩得個5分鐘!!!而且係咁多個玩過的鬼屋中最唔好玩, 最唔恐怖兼最短路程的一個, 所以藉此呼喻大家可以跳左這個鬼屋, 留返D時間去玩其他鬼屋或機動遊戲仲好; 我地成班人玩到最後一個叫"勾魂葬族"既鬼屋, 算係最好既一個, D人扮鬼都算幾落力, 而且路程又是最長的, 都算係過足鬼癮. 當晚除了主力玩鬼屋外, 亦抽了時間玩了一些機動遊戲 – 跳樓機、海盜船同埋動感影院, 處處都是人龍, 能玩到其中3樣機動遊戲都算是了不起了!
其實當晚雖然能夠參與的遊戲及鬼屋並不多, 但這並唔不重要, 反而我最enjoy的是可與成班同事一起消閒了整個晚上, 因我很久都沒這樣跟一大班朋友這樣子般大玩特玩過了, 所以我非常享受這種氣氛!
當晚我們約11時半左右離開, 然後拉大隊到銅鑼灣打邊爐, 打到差不多約凌晨1點半才各散東西. 久違了的夜生活, 看來快將來再度來臨了~~~
近來唔知點解好鬼死忙，鬼死咁多野做，所以連寫Blog的時間都抽唔到出黎(係真係抽唔到!) 點解咁鬼忙?我都唔係好清楚，總之成間公司好多林林總總大細事情都要我出下力，真係忙到癡肺。
今日我都係忙裏偷得少少時間出黎寫Blog. 今日我都幾興奮, 因為今晚約左成大班同事一齊去海洋公園參加”全城哈咾喂”! 我咁大個仔都未好過D咁既活動, 每年10月Halloween咪又係咁過~有工就返工，無工返就屋企打機，今年卻因轉了新工關係，可以跟一大班人去玩，真係特別開心架! 咁詳細既行程同玩後感，要等我完成呢項活動後才能夠記底喇!
早幾日行過觀塘apm, 見到係大堂擺左幾個booth(有鐳X, 百X匯, 豐X…等等)買手電, DC等. 八卦行埋去睇睇, 原來有幾部大廠既手電都做緊promote, 好似SE, Nokia, Samsung同Motorola都有特價, 我一睇就睇到我最近比較有興趣既摩記V3, 不連藍芽耳機都係賣$2480! 抵!!! 但同場摩記E680i都做緊大特價, $2530(現金價, 不設分期付款)包個Welcome Pack之外, 仲額外送多512M SD卡!!! 即刻打俾我用緊呢款機個老友問佢意見, 佢就話緊係抵出啦~佢買個陣時都要成$2780, 仲無512M卡送添! 咁我之前見佢用呢隻機都幾多function玩, 又可以聽歌, 又可支援jpeg, gif, pdf等等類型的檔案, 又可睇埋網頁, 係衰在佢機身比較大件同埋鈴聲較弱, 但優點之多巳蓋過了缺點, 所以猶豫左一陣, 終於都扑搥決定!
買左之後, 為左要熟習這部PDA stytle的手提電話, 返到屋企除了要不斷"刨"manual外, 仲會上網搵相關newsgroup研究; 我咁耐以黎都真係未試過咁大陣仗去研究一部電話, E680i, 你都真係巴閉law~~~~
Motorola E680i
<童夢奇緣> - 劉德華作品
話說早幾日同女朋友食飯兼睇戲, 咁佢想睇劉德華套<童夢奇緣>, 咁就睇law~. 睇完離場後, 整體感覺唔錯, 仲覺得係套片中好似有D得著添!
故事講述劉德華的童年因一次意外的奇遇, 經過一夜之間變成大人, 之後仲不斷成長下去, 最後變成一個80多歲的老伯! 未到戲院睇前, 以為套片的橋段是抄湯漢斯陣年舊作<飛越童真>, 唯睇完後便覺得是兩碼子的事. <飛越童真>的劇情以一個小朋友突然由小孩成為大人後的心路歷程, 以及其後於社會遇到的經歷為主線, 而且最後以happy ending收場; <童夢奇緣>的著墨處則是放重於劉德華與黃日華之間的父子情, 導演想藉著劉德華由小朋友急速成長的短短幾日中, 對父親由原來的憎恨, 轉為最終的體諒, 但最後結局卻是悲劇收場(雖然戲內並沒有交帶劉德華最後是死還是變回孩童, 但我依劇情看覺得能夠還原的機會不大).
雖則有應采兒飾演的老師穿插其中, 但只是過場, 愛情成份較少, 而且應小姐的演技仍屬普通過普通; 反而莫文尉飾演的後母幾搶戲; 林家楝都算交到功課; 反而黃日華D戲就爭D, 好似演緊電視劇咁~! 劉德華雖則係好戲之人, 但亦不能完全演譯到那種由小孩變為大人時應存有的天真動作, 太多的小動作流於"大人化", 如用筷子吃飯, 以及一些說話時的語氣等, 值得一讚的反而是劉華那個80多歲的老妝, 真的唯肖唯妙, 唯一缺點則是劉華那把由30至80歲都是同一樣的聲線, 如能把那聲線都變成個80歲的老伯伯, 那就真的天依無縫了!
看得出此片是誠意之作, 睇到後段我都忍不住淚盈於睫. 我不是劉德華FANS, 但我都會選擇睇劉華好過睇成龍.
.
