昨天終於可以取回仔仔了, 到了西貢車房一睇, 仔仔經過全身噴油, 焗油後, 真係好似跟無炒車之前一樣咁靚仔, 真係好開心 , 然後順道跟班車房佬吹水, 傾傾下先發覺到近來仔仔大食左油的原因, 原來係自從我幫架愛駒換左個不锈鋼風箱之後,駁原裝風箱的一條喉管並沒有駁上新的風箱上, 所以吸氣量比以前增大左, 咁油就自然食多左!!! 咁經過佢一翻講解後, 只需加個甚麼MP7的東東(好似係甚麼二次原進氣之類), 咁就可以改善食油既狀況, 但一個小小類似喉管的東西, 竟要成四百幾以至千幾銀!!!!!!!!! 我點買得落手呀??? 好彩亞車房哥哥話幫我DIY都得, 仲連料及人工都係百零二百蚊o者, 咁都無咁傷……嘻嘻, 唯有下次等佢買好料後再駕車入去入俾佢整啦~~~~

但架車個水溫錶就certified左.....唯有俾錢換個新啦~~~真係一波未停, 一波又起…..

《神話》- 成龍電影‧唐季禮作品

早排終於打爆左隻真三國無雙3, 搵齊哂所有隱藏人物出黎, 唯獨最終level 10武器就只係搵得一兩把, 算吧!還豎個角式就算裝備左個level 10武器後都無咩特別睇頭, 初時以為用佢出無雙技時會有d特別CG場面出現, 點知乜鬼野都無…….

Tong-Yum-Goong 冬蔭功

跟住早幾日去信和入貨, 買左幾隻新game, 有Tony Jaa既“冬蔭功”, “2 Fast Driver”同“Constantine”(魔間行者); 對“冬蔭功”呢隻遊都幾有期望, 話哂始終都係為動作明星而出的遊戲, 當然要奉下場啦~ 點知install完後一玩, 都幾不知所謂, 畫面質素差唔在講, 敵人體力又無顯示, 出招時又唔暢順, 而且遊戲故事薄弱, 攪到我對此game都無哂興趣…..

2 Fast Driver

另外隻“ 2 Fast Driver”就係我睇game書時推介至買的, 每架車仔個outlook又確然係幾Cutie, 玩既時候都幾有新鮮感, 畫面質素都幾好. 我見到起碼有成5-6個賽道可供選擇, 但初初玩時不論係“ FEE MODE”或比賽模式時都無得自己選賽道, 需要係比賽模式內每次比賽都得了第一名後才能開啟下一條球道. 遊戲難度其實都唔低, 而家我只能開啟到第6條球道(可能自己技術差勁), 都幾難玩(每進一關敵人的能力就會相應提高!), 但相對黎講, 其實變相“ KUM”玩左….

Constantine 魔間行者

跟住最後隻“Constantine”(魔間行者)遊戲喇~~~唔知係唔係之前睇左電影版既關係, 玩呢個game時特別投入, 而且覺得個game既過場CG做得真係幾好, 幾有電影感; 遊戲方法係類似Max Payne, 因此正是我喜歡的遊戲類型, 而我都正在狂熱煲緊此game中, 因此再次使我進入日月無光, 天昏地暗的煲機日子了………

剛剛過左既星期三我駛左部Jazz入西貢車房執返D手尾, 事關之前車房幫我換的那個仿無限鬼面罩手工唔係咁好, 所以佢地肯負責幫我攪返掂佢, 咁就緊係好啦~~~因我去到仲幫襯埋佢地既噴油服務, 佢地又可賺多一千幾百, 大家都happy麻~~~

點知擺低車走個陣時大頭蝦, 留低左個手提話係車內; 仲要成個星期至取得返架車; 需然好唔方便, 係街度突然想打電話時都唔知係邊度打好, 電話亭又買少見少, 唔通要摸仿警訊入面D賊人問人借電話, 然後挾"電"私逃? 講下笑就得, 不過無電話又真係唔係幾方便; 但係另一個角度睇, 咁又覺得幾好喎, "失電"期間唔洗俾D豬朋狗友煩親, 又唔洗俾D推銷電話騷擾, 更加可以暫時避開女友既套命追魂call, 真係樂得耳根清淨, 都算係近期既一大樂事, 因此要記低佢~~~~

翻新大少翻不了身

近排得閒都會睇下套<翻新大少>, 因為佢剛剛係我放工返屋企後無耐就開場, 所以全家都會用佢黎送飯, 但其實對這套戲的興趣講真卻不大. 呢類型的電視劇, 無線N年前都巳經拍緊, 而家只係覺得佢翻炒又翻炒, 講主角"戴少良 - 大少"(歐陽震華)點樣從有變無, 跟著又從谷底點樣翻身的故事 – 好一個老掉牙的劇情.

其實睇睇下都覺得幾悶, 不計那些唔係幾好笑的笑料, 剩係歐陽震華那巳接近全禿的半禿頭, 仲要扮哂情心款款咁去愛人, 去鍾意人, 都咪話唔難頂. 劇情發展又講到佢有郭麗琴(向海嵐)喑戀佢, 遲D有有卓琳(郭羡妮)鍾意佢, OK, Fine!!! 條感情線係咁發展並無問題, 但問題係麻煩無線選角時真係要落下功夫先, 唔該搵個有D說服力的男主角, 我地作為觀眾都真係幾難會有代入感, 始終呢個世界真係唔係好多女仔會鍾意醜男, 尤其係禿頭個隻.…..

其實唔係話歐陽震華唔好, 不過宜家巳經再唔係佢既年代. 以前都鍾意睇佢做<跎槍師姐>同<洗冤錄>, 當時會覺得佢做得幾生鬼同幾好笑. 但個陣時接受佢並唔代表以後都可以容忍佢既原地踏步, 你而家睇佢係<翻>劇的表情, 動作, 語氣, 同以前<跎>劇同<洗>劇如出一轍, 無變化, 無進步, 在現今社會裏, 觀眾的口味正不斷改變, 演員的不進步, 最終只會換來被淘汰的命運.

另加上郭羡妮, 向海嵐及蔡子健生硬的演技, 就算有黎耀祥的老手幫一把, 亦不見得有任何起色. 我看<翻新大少>, 並不能真的可以翻身呢!

昨天終於可以有得去為我架愛駒裝個仿無限鬼面罩, 諗住星期六放假訓晏d咪下午至去, 點知下午突然狂風大雨, 個天黑麻麻, 唔通又要延期?都係唔喇, 再延就真係唔知幾時先再得閒, 唯有冒雨去換啦~~~

到了西貢車房, 個車房佬就開始幫我裝, 當佢開我架車既車頭蓋時突然同我講: [嘩! 你連水箱蓋都無蓋好就駕車? 好彩個蓋仲係到(個水箱蓋就放係車頭水箱入水處旁), 如果唔係又要浪費錢去買個新架喇!]

跟住我才醒起我剛剛開車前幫水箱加水, 跟住就唔記得蓋緊返個水箱蓋就開車! 真係好彩由我家裏到西貢都係比較短的車程, 期間又無咩點特別踏油加速, 否則就真係後果不堪設想了!!!(見到個車頭蓋頂內則水箱頂d鐵都溶埋, 可想而知d水有幾熱)

雖然有險過剃頭, 不過都俾我學到樣野, 就係原來無水箱蓋既車都可以行得走得架!不過就好鬼死危險law, 以後每次出車前都要check清楚至好開車, 否則後果堪然!!!

PS 不過到而家都唔係好明個車房佬發覺左我無蓋好水箱蓋行車後, 竟然關心咁講句"好彩個蓋仲係到, 如果唔係又要浪費錢去買個新架喇!"咁既說話, 司機既安危係好明顯緊要過個只值幾十蚊的水箱蓋啦! 真係唔明呢D人個心真係掂諗架~~~

其實近來都心思思想換電話(自從我大妺去世後就用左佢部電話至今 – Sony Ericsson K700i), 但又想保留我大妹生前最後用的一部手提, 因此諗住就咁另外買一部新的就算. 但後來發覺家陣比較算係新的電話都動輒要二, 三千蚊, 都幾鬼死貴! 其實原本用緊部電話有D問題, 一係突然斷線, 一係按完電話號碼打出後又突然cut線(原來係SE通病>.<), 再加上外殼巳經花鬼哂, 點知拿出去問價都竟然值$1200個大洋!!! 咁就係幾經反覆的思量下, 終於賣左部電話~~~~

其實賣個陣時都幾唔捨得, 但係最終金錢都戰勝左一切, 所以我都覺得自己幾過份 ./. 好似對唔住我妹妹咁....

所以都諗住黎緊假期探我大妺時順道同佢say sorry, 等佢原諒我. 始終一世人得我一個大佬, 我知佢唔會咁小氣既

PS 亞妹, 你亞哥我諗住買部摩記黑色V3, 見佢水貨機賣$1700-$1900到, 你話好唔好?俾見意見亞哥我丫!

話說星期日同亞媽預早慶祝佢生日, 同佢去睇戲兼食飯. 個日就同佢先睇一套電影<格林兄弟幻險記>, 再去APM food court食飯.

套<<格林兄弟幻險記>>除左我亞媽話想睇之外, 其實我都對佢有D興趣. 事關我都好鍾意睇呢類格林feel童話故事式既電影, 好似魔戒三部曲, 哈利波特等等......一望電影張psoter, 無乜巨星, 得個麥迪文咁大把! 言下之意即係應該以劇情同特技掛帥啦!!!咁就更對我胃口, 但當我睇完全套片出來之後, 卻只覺得不過不失.

套片初段比較沉悶, 用左較多編幅去講佢地點樣去裝神弄鬼去呃錢; 到中段格林兩兄弟入森林至開始有野睇. 其實成個故仔個概念唔錯, 特技亦可, 只係覺得套戲個故事講得唔夠具體, 好散, 零零碎碎咁, 攪到好似到喉唔到肺咁. 同埋你睇睇下會發覺有D劇情突然跳得好快, 好似俾D剪片佬剪鬼左咁, 會有D"無啦啦會咁檥既?"的感覺.

到劇情中段以後都算一氣呵成, 無咩悶場. 而且D特技gimmick都幾得意, 戲中最有睇頭的一幕係第十二個俾擄的小朋友係井旁俾隻烏鴉整到成身污泥, 跟住跌哂d眼耳口鼻係"pat, "泥到變成一隻妖怪時係最俾到我震憾, 其餘就一般...>.<

但點都好, 可能自己真係比較喜歡呢類童話式既電影, 加上近來比較少呢類電影上畫, 對於好此類片的我們來說真是"餓戲"巳久, 因此<The Brothers Grimm>亦是值得入場的一套好戲!

                                                            格林兄弟幻險記

昨天同亞媽食飯預祝佢生日. 點解要預祝?因我老媽子本應下個星期一(9月12日)正日生日(無錯, 係同迪士尼開幕同一日!), 但佢就一早約左D"師奶"朋友係佢個生日正日一天遊, 而我細妺又要係星期六同星期日做姊妹, 咁就唯有係星期五提早攪食飯啦!

琴日食飯時我仲帶埋我新女友去, 當係見家長^^很不幸既係我老豆唔舒服, 留左係屋企休息. 咁唯有得我同我女友, 我細妺同老媽子四個一齊食飯. 都係普通咁食飯, 過程無咩好講, 不過我女友就真係醒目, 識得買個生日蛋糕氹我老媽子, 我老媽子都不知幾開心, 笑到見牙唔見眼, 我心諗:『仲唔加哂分!』 跟住我亞媽仲叫埋我女友上我屋企飲湯, 跟住我夜D就駕車送佢返屋企.

雖然老媽子係幾開心, 但係我覺得佢唔係好鐘意我呢個女朋友, 可能唔鐘意我女友有點肥, 又可能覺得個仔好似俾人搶左, 以後會唔理佢, 不過都係我自己諗o者~~~可能未必呢!!! 但係我都拿拿聲自動獻身話星期日陪老媽子睇戲同食飯, 等佢老人家唔洗亂諗野麻~~~